12. juni 2015

Sommarlesing: Krim. Eit samleinnlegg

Eg har sett sommarlesing som overskrift, men her på mine trakter har veret vore lite sommarleg til no. Sidan dette (veret) er noko som ein absolutt ikkje kan gjera noko med, gjer eg det beste ut av det: Krøllar meg saman i sofaen med ei bok.
Krim er så mangt. Eg tykkjer det er fascinerande at sjangeren er så mangfaldig - og det er ein av grunnane til at eg les masse krim. Her er korte omtalar av nokre svært forskjellige krimbøker eg har lest i det siste.


Den som reddes kan av Sophie Hannah
Cappelen Damm 2011
431 sider


Ei innfløkt, interessant og høgst uvanleg historie. Skrivestil og miljø minner om bøkene til Tana French. 'Den som reddes kan' er velskriven og elegant, men litt vanskeleg å komma inn i sidan dette er bok nummer tre i ein politikrimserie. Karakterane på etterforskarsida har sine fortider og historiar seg imellom - og akkurat det fann eg litt krevjande å finna ut av.
Forfattaren strør ut ei mengd trådar, spor og villspor. Fyrste halvdel av boka er saktegåande og litt forvirrande, medan andre del er meir actionfylt, nervepirrande og thrilleraktig.
Handlar om skakkøyrde ekteskap, dei heller mørke sidene ved morsrolla, falske identitetar og det som vert kalla familietragediar.
Boka gav meirsmak og anbefalast, men det er nok ein fordel å lesa 'For du stjal min lille venn' og 'Skyggenes time' før denne.
Terningkast 4.


Det perfekte mord av Peter James
Schibsted 2012
142 sider


Ei tynn bok og ei tynn historie, bokstaveleg talt. Lettlest, fortlest og fortgløymt.
Likevel; det er noko her - noko bissart, noko Roald Dahl'sk, som gjorde at eg fekk lyst til å lesa meir av denne forfattaren.
Handlar om eit middelaldrande barnlaust ektepar som ein gong elska kvarandre. Etter kvart har dette endra seg; dei er blitt så lei av kvarandre at dei kvar på si side har funne seg andre partnerar - og begge har planlagt å myrda den andre ektefellen.
Det store spørsmålet blir då; kven myrdar kven - fyrst? Og kva blir konsekvensane for den attlevande?
Handlinga er tragikomisk, hovudpersonane og etterforskarane er stereotype og løysinga finurleg - om enn noko forutsigbar.
Terningkast 3.



Rød sone av Asbjørn Jaklin
Vigmostad & Bjørke 2014
344 sider


Velskriven og velkomponert med verkelege hendingar som bakteppe. Boka vart nominert til Rivertonprisen i fjor - og er skremmande aktuell, no som me atter ein gong kjenner litt på gufset frå den kalde krigen.
Sentralt i handlinga er den kjende og mystiske flyulukka i Mehamn i 1982. Hovudpersonen, journalisten Alex Winther, med ei fortid i forsvaret, vert sett på saka om ein britisk tidlegare jagarpilot som vert funnen død under uklare omstendigheiter. Det viser seg at denne personen var ein av seks pilotar som deltok i den skvadronen som var mistenkte for å stå bak ulukka med Widerøe-flyet den gongen. Når det så skjer eit mordforsøk på ein journalistkollega, skjønnar Winther at einkvan vil gjera alt for å halda fortida hemmeleg. Boka er tidvis ganske spennande, og tidvis litt kjedeleg - det gjeld spesielt alt som vedkjem sjølve hovudpersonen. Det trøblete forholdet til kjæresten og angsten han slit med er så liksomdramatisk, tykkjer eg. Terningkast 4.



Merket for livet av Emelie Schepp
Gyldendal 2015
403 sider


Ei bok med uhygge, aktualitet, spenning og driv. Dette er forfattaren si debutbok som i utgangspunktet vart gitt ut på eige forlag - og som (likevel) vart ein suksess.
Hovudpersonen, statsadvokaten Jana Berzelius er ein uvanleg og interessant person med ein uklar bakgrunn. Saman med ei gruppe politietterforskararar har ho fått ei vanskeleg drapssak på bordet. Det einaste sporet ein kan finna etter at sjefen for Migrationsverket vert funnen myrda er etter eit barn. Og eit barn kan då ikkje stå bak eit drap - eller? Saka tek deretter ei uventa vending - og Jana vert personleg involvert.
Boka er lettlest og med eit originalt plott, men eg irriterte meg litt over alt pjattet; unødig detaljerte skildringar av karakterar og miljø - som ikkje har noko som helst å bety for handlinga. Likevel gir eg boka terningkast 4+ og ser fram til neste bok.



Hjemstavn av Arnaldur Indriðason
Cappelen Damm 2012
295 sider


Melankolsk og litt trist og tregt - men som alltid; svært velskrive frå denne islandske forfattaren.
Eit nytt møte med gjennomgangsfiguren Erlendur og behovet hans for å finna svar på gåter frå fortida. Han har heile livet kjent på saknet og skuldkjensla etter at broren forsvann i fjellet ved heimplassen - for over 40 år sidan. Medan han oppheld seg i det nedlagde og forfalne småbruket til familien dukkar det opp ei anna forsvinningssak frå den same tidsperioden. Erlendur startar si eiga etterforsking, nøstar langsamt og møysommeleg opp i den gamle saka - og drøymer samstundes om at trådane i hans eige liv også skal kunna nøstast opp.
Landskapet, veret og naturen er - som vanleg i romanar frå Island - effektfulle og viktige rammer for forteljinga.
Eg meiner dette er ei av dei beste bøkene til Indriðason. Terningkast 5-. 

9 kommentarer:

  1. For en kjapp og fin gjennomgang av siste tids krim. Jeg har lest 3 av dine 5 bøker, og likte Merket for livet best av dem. Rød sone syntes jeg var for "guttete" og til tider kjedelig, men jeg presset meg gjennom den. Leste den siste av Indridason denne uken, og savner Erlendur, enig med deg at Hjemstavn fortjener en 5`er. Ønsker deg en super helg!

    SvarSlett
  2. Takk det same, Tine.
    Er spent på den nyaste Indridason. Han har ein eigen stil, uansett kven som er hovudperson.

    SvarSlett
  3. Jeg har bare lest Rød Sone- som jeg likte veldig godt- av disse. Men jeg har Hjemstavn, og den skal leses, fordi jeg liker det har lest av Indridason.:) God helg Berit. Nå venter jeg på Mord og Mysterier på TV2..:) Man får holde seg inne...

    SvarSlett
    Svar
    1. Dersom du har likt dei andre bøkene til Indridason kjem du heilt sikkert til å like denne.

      (Eg har ikkje vore "innom" - verken på eigen eller andre sine bloggar denne helga, difor seint kommentarsvar. Me har hatt eit glimt av sommar - og det må nytast og nyttast utandørs!)

      Slett
  4. Ingen fellesbøker i omtalene dine, men du fikk meg penset inn på Indridason som jeg har stående i bokhylla. Jeg har ikke lest noenting fra ham, så nå gleder jeg meg til å ta fatt på Hypothermia. Har du lest den?

    SvarSlett
    Svar
    1. Godt spørsmål, som eg måtte bruke Google til å finne ut av. Ja, eg har lest Fjellet - som er den norske tittelen - og likte den. Eg har lest (og likt) dei fleste i serien om Erlendur: Fjellet, Myren, Røsten, Vannet og kva dei no heiter alle saman.

      Slett
    2. Ah.. jeg trodde i utgangspunktet at Hypothermia var norsk tittel... Med irsk samboer ser det ut for at man kan bli språkblind.. Fjellet på norsk? Da skal jeg (etter jeg har lest) google omtaler :-) Har hørt mye godt om Indridasjon, så nå var det på tide med en kald krim-Islending - etter jeg nå har fortært Santiagos heite kubanere :-)

      Slett
    3. Apropos: Hypotermi (nedkjøling) er også eit sentralt tema i Hjemstavn.

      Slett
    4. Notert! Ca 80 sider ut i boka registrerer jeg at det er underlig å lese om islandske stedsnavn på engelsk... men lovende bok!

      Slett